URTZ

"Azken Eguna Zuzenean"

Horri txuriaren aurrean jartzen naizen bigarren aldia. Lehenbiziko ahalegina onezkero hor ibiliko da ordenagailu honen barruko autobide chip-ietan gora eta behera, noraezean. Neure garunetako ideiak dabiltzan bezalaxe. Kostatutako despedida da hau. Ondo kostatutakoa. Gainera neuk eskeini nuen neure burua lan honetarako –orainartean inoiz egin izan ez dudana- bainan, talde honi idatzi eta eztarri urratualdi bat baino gehigo eskeini dizkiot azken urte hauetan, eta barruan sentitzen nuen agur honetan ere nola edo hala parte hartu beharra. Ederki damutu naiz. Uste baino zailagoa egiten ari bait zait hain gertuko norbait agURTZea.

Bart ikusi dut disko –bikoitz- honetan datorren DVDa. Kolpean. Segidan, beste ezertarako segundurik ere hartu gabe. Eta taldearen kantuen errepasoarekin batera berriz bizitu dut laukote pasaitarraren ibilbidea. Lehen maketa hura. GOR disketxearekin estreinako kontratua. Lehen disko arrakastatsua. Bigarrena. Askoz osoagoa gainera Kaixo, Bizitzarekin Dantzan, Iragan Hil Baino Lehen..., abestiekin. Hiru eta laugarrena ere bide beretik, beti goraka. Bost. Partaide aldaketa. Disketxe aldaketa. Sei. Eta orain... Zazpigarrenean atsedena hartzeko unea.

Batez ere kantuak egin dituen talde bat izan da Urtz. Abestiak daude soinu hauen atzean. Sentimendu asko agerian uzten dituzten abestiak. Eta orain bata bestearen segidan entzunda konturatzen da bat –berriz ere-, azken hamarkadako soinu bandan ezinbestekoa dela Urtz. Bestelako adjetiborik behar ez duten zenbat ABESTI.
Nire gusturako taldearen –ahaleginik haundiena izateaz gain- lanik haundiena da hau. Dauden kantu guztiak dira ezinbesteko, lekurik izan bazen, beste batzuk kabituko baziren ere. Bainan hanka sartzeko beldurrik gabe esan dezaket daudenak inoiz baino hobeto daudela.

Tamaina honetako apustu bat -azken kontzertutik zuzeneko disko eta DVD bat ateratzea ez bait da txantxa- irabaztea “tokatu” zaio laukote gipuzkoarrari, eta orain horren saria denok gozatu dezakegu. Gozatu bai, bainan horrelako lagun talde baten despedida gutunak uzten duen zapore gazi-geza hau barrutik nola kendu asmatu ezinik...

Joseina Etxeberria.